makkah caffe

ليلة الدخله والمزح الثقيل !!!!!!!!!

اذهب الى الأسفل

ليلة الدخله والمزح الثقيل !!!!!!!!!

مُساهمة من طرف غير الناس في الخميس مايو 19, 2011 7:47 am

ماتحسون اني أبثرتكم ؟؟ قولوا : إيه
_: ايـــــه



وإذا ابثرتكم ؟؟ منتدى أبوكم هو ؟؟؟<<<<<<<<< يدور المحارش



لا جد جد عاد الصدق ماتلاحظون كل يوم والثاني منزل موضوع ؟؟
الصدق الصدق ما فيه أحد منكم قام يتسائل ليه الانسان العاهه ذا مبلشنا ؟؟
أنا أقولكم علشان ما أحد يسول له تفكيره ويتوقع إني مرتاح لكم أو من هالقبيل
لبدن , السالفه وما فيها إنكم تصدقون كل شيء <<<<<<<<<< بيحارش بيحارش
لا الصدق يعني موضوعي اللي عن التسذب قايلكم ان اللي مايعرف يتسذب
يبدأ سالفته بـ ( قسمبلاااااااه , والله العظيييييم )
والموضوع اللي عقبه كل سالفه والثانيه مقطعها بالحلوف ,
على الأقل قولوا تسذب قولوا أي شيء يحسسني بالذنب
مير لا حياة لمن تنادي <<<<<<<<<< هذا لا قالوا لك عاهه مستديمه

وبعدين وش فيكم عصبتوا تراني امزح ماتحبون المزح ؟؟؟

الا على طاري المزح بقولكم سالفة صايره بكليتنا هالترم
هذولا كم طالب صوروا طالب ثاني المهم صوروه وهو يغش
وركبوا عليها أغنيه وكلمات ع الفيديو تريقه وشرحوا المقطع بإستهبال وكتبوا إسم الطالب
ونزلوه باليو تيوب الرجال شاف المقطع وعصب وراح يتهاوش معهم وش سووا ؟؟
صوروه وهو يهاوشهم وبرضوه شوية استهبال على خلفية اغنية على كم كلمة
ونلزوها بعد كم يوم باليوتيوب وبرضوه منزلين اسمه كامل
تحسون انهم مصخوها صح ؟؟؟
انا حاس انهم مصخوها من أول مقطع
تجيكم السالفة عقب اتصل عليه واحد منهم وقال حنا من البنك العربي للإستثمار
ومغطوا الضعيف تمغيط وتتريقوا عليه ونزلوه والمقاطع مايفرق بينها الا كم يوم
الولد قفلت معه ومن حقه صراحه وينا فييييييييييه خصوصا ما فيه أي ميانه بينهم
بس هم بغوا يحطونه محل سخريه<<< رجاء اللي خق على كلمة ( محل سخريه ) يوقع جنبها
المهم الولد حسبت ما سمعت قبل يومين انه قدم أو بيقدم شكوى رسميه
وبيني وبينكم العيال اللي متورطين منخرشين ومايحضرون هالأسبوعين
القهر انهم كلهم خريجين وخلاص مابقى شيء ويتركون هالكليه وحوستها
يعني إذا الشكوى صدق اتوقع راحوا فيها خصوصا إن أبوه واصل واصل واصل


ماعلينا منهم الله يستر عليهم <<<<<<<<وش بقيت
المهم هذا مثال لنتيجة سلبيه وجدا سلبيه للمزح الثقيل اللي على غير سنع

عاد شعبنا الحلو والمزح حدث ولاحرج ولاعندهم لا حد ولا نوع معين من المزح
ومرات المزح يجيب العيد في المازح ومرات يجيب العيد في الممزوح عليه


واحد من العيال يسولف علي قبل فترة هو متزوج طبعا يقول قبل الزواج وبفترة الخنبقه على حد قوله
يقول اتصل علي رقم غريب وارد الينه صوت وحده شوي الا غلطانه الا منيب غلطانه الا بنسولف
الرجال طبعا قلبه أخضر وبدأ يخثرق
شوي الا ويسمع : محيميـــد وجــــع
الضعيف خالته مطلعه رقم جديد ومتجمعه هي وامه وباقي خالاته
يقول والله ياجلست لي فترة ما أروح أسلم عليهم

واحد من عيال عمي زمان كان طالع مع ناس للبر
وواحد منهم معه فرد يعني مسدس ولغير الناطقين باللغه العربيه ( مددس )
المهم جالس يشيل منه الطلقات يفرغه , يوم فرغه ويصوب المسدس لولد عمي على انه فاضي
الأولى , الثانيه , الثالثه , طبعا الفرد فاضي يوم جات الرابعه
ويصوب المسدس في السماء ( طاااااااااااااااااااااااع ) صار باقي طلقه
صاحب الفرد يقول والله ما استهبلت وعلى انه فاضي مادري وين جات ذي
الحمد لله ولد عمي حي يرزق والحين عنده بزرين كل ما كلمته الينه يلعنهم

يمكن اغلبكم سمع سالفة اللي بيوم زواجه ويجي خويه يمزح معه مزح ثقيل
ويكلم الحلاق قال له هذا مبلغ بس ابيك لاجيت تحلق شنبه اشطبه علشان يضطر يشيله كله
المهم صارت مشكله وعرف ان خويه اللي مسويها الرجال رسم له شنب ودبر عمره
ومع العرق والعصيرات هاللي رسمه ساح وطلعت الفضايح

راحت الأيام وتزوج خويه قال أبد والله مايجيب عشاك الا أنا
جاب العشاء لهم بالشقه وطبعا العروس والعريس كل واحد عصير مختلف
وقام حط ( مسهل ) او ( حله ) على ما يقولون في العصير حق المعرس خويه
المهم وداه لهم وهم في رجى الله جالسين المعرس وعروسه
مع اللخمه والحوسه وانتم خابرين كل واحد فيهم خذ عصير الثاني
يعني العروس شربت ( المسهل )
و الضعيفه ماطاعت تطلع من الحمام وصياح ونياح ضاق صدرها
ومن بكره وداها بيت اهلها وحالة يرثى لها

ماعرفهم والله بس السالفة منتشرها وأكيد سامعينها


يعني مدري هالمزح الثقيل هل هو فضاوه والا استعراض خفة دم والا اضطراب نفسي والا وش ؟؟
لعنبوا بليس هالعالم والله يا يمزحون مزح يجيب فيك العيد
مثل اللي سرق جوال خويه بالدوام وارسل لكل القائمة : ترى العشاء عندي الليله
والصعيف رايح يغسل مدري يصلي وتوهق



أذكر أول مابديت أسوق طبعا اتنافض وعلى قولتهم أباري الساس
المهم رايح اجيب شغلات لأهلي والقى اخوياي بالمدرسه واقفين بسياراتهم
طبعا هم يسوقون قبلي مسكت معهم الا يتميلحون علي ويهبلون بي عارفين اني عليمي
والله وانط الجزيرة اللي بين السيدين واتعلق وصارت سالفة وأبوي كلم أبوانهم وانجلدوا قدامي
طبعا خلاص انتهت صداقتنا قالوا انت بزر ولا ينمزح معك
اي مزح الله يلعنكم علقتوا سيارتي بالجزيرة وصرت مضحكه بالحاره يالتسلاب

وأذكر مره الظاهر كنت بثاني ابتدائي أو هيك شيء المهم خالي وقتها كان أكبر مني بأربع سنوات
والى الحين والفرق بيننا اربع سنوات <<<< قايلكم عاهه ما تصدقوني
المهم قال حط يدك تحت خدك , هذيك الحركه اللي نسويها علشان نمثل اننا نصفق الواحد
وحنا نصفقه مع يده تمثيل يقالك والله وأحطه
انا يوم شفت يده كني حركت راسي ويصمخني في خشتي ,واطقها بتسوه
هو بلش بي لأن جدي الله يرحمه بيجلده
قال شف الدريشه اللي فوق فيها عصافير معهم فراخه بجيبهم لك بس اسكت
عاد سكت <<<<<<<<<<< يلعن أوم طموحك النايم


المهم السوالف تطول وتطول واخاف اطول زياده ثم ما تلقون شيء تتكلمون فيه

قلنا نعطيكم المجال شوي تستآهلون معطيني جوي من أول سطر إلين خلصت


نجي لأسئلتنا

وش تتوقع بيصير على الطلاب اللي نزلوا المقطع باليو تيوب ؟؟ <<< واضح اني مشفوح

وش أقوى مزحه صارت لك ؟؟ وش نتايجها ؟؟ وش كانت ردة فعلك لها ؟؟

تؤمن بمبدأ رد المزح بمزحه أقوى ؟؟ والا تقطع العلاقه وقضينا ؟؟

عمرك مزحت مع أحد وتحسفت إنك مزحت ؟؟ اسدح لنا وش صار ؟؟

بما ان مواضيعي كاثره هالأيام انتم تصدقوني أكثر لا قلت ( قسمبلااااه ) والا إذا ماحلفت ؟؟
( علشان أستفيد بالمواضيع الجايه <<< ريض في البثاره )



_________________
{ الَيوم } أنا معْكم .. و { في يوم } سأغيب عْنكم
فاعْذروني ان قصرت { في حقكم } .. او بكلَمة { جرحت خواطركم } .. ا
avatar
غير الناس
مشرفة قسم تعال وانسى الهم

انثى عدد المساهمات : 913

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى